UN CATEDRÁTICO
PARA A HISTORIA: DON RICARDO CARBALLO CALERO
DÚAS PALABRAS A MODO DE LIMIAR:
Pregúntame Dulce se me deu clase
Carbalho Calero: lamentablemente, non. Pero coñezo moita xente, algúns ben
amigos noutrora -ou sempre, porque a fidelidade lévase e nótase aquí, dentro- a
quen si: deulle clase a Carmela, a Lisardo, a Uxía, a Beni, profes que son ou foron
vosos… Deulle clase a Anxa, a Manolo Castelao, a Salinas, a Ferreiro, a Carlos
Paulo…, todos alumnos que foron da Universidade de Santiago, todos daquela
ilustre fornada, a Primeira Promoción de Galego-Portugués. Fermosa e feliz
tamén ela, nunca suficientemente relembrada, frase nominal: a Primeira
Promoción de Filoloxía Galego-Portuguesa. Gloria de Galicia. Que grande
cabaleiro era don Ricardo: nada que envexar a aquel Castro galego, Fernando se
non erro, de quen ficou escrito no mármore Aquí yace toda la lealtad de
España. Nadiña. Fiel ao ideal político, fiel a unha ética social, fiel a un
idioma desprestixiado pero rexo e poderoso sempre. Había que velo polos
corredores da facultade, oír a súa xurdia voz, ser fitada polos ollos de aguia
ártabra. Aquela facultade co brasón na pedra de Mazarelos. De don Ricardo
vénnos as primeiras lecturas medievais e no seu inmorredoiro manual prende
forte a raigame en moitos de nós do amor á lingua galega. E cantos de vós,
fillos, rapazas e rapaces que fostes meus alumnos, non me vistes encher con
orgullo a boca cando vos dicía que el, Ricardo Carballo Calero, ferrolán
universal, soubo honrar a cátedra de Lingua Galega na Universidade galega? Que
a terra lle sexa leve!
Dulce prepara cos alumnos unha entrevista
sobre o noso protagonista que promete compartir connosco. Mentres agardamos,
déixovos en mans moi autorizadas. A Universidade da Coruña, onde imparten aulas
brillantes ex alumnos de don Ricardo, pon á nosa disposición unhas páxinas que
non podemos perder de vista. Velaquí: https://carvalhocalero.lbd.org.es/
Ningún comentario:
Publicar un comentario