AS GRANDES DAMAS DO ENSINO

 

AS GRANDES DAMAS DO ENSINO

Ana María Romero Masiá

 

(Foto tirada da web da Real Academia Galega)

 

 

Acaban de nomear académica correspondente da Real Academia Galega a historiadora Ana María Romero Masiá. Un nomeamento merecido. Ana María Romero foi catedrática de Xeografía e Historia moitos anos no coruñés Instituto ‘Monte das Moas’, centro que dirixiu un tempo e onde se xubilou. Tamén traballou en Ferrol (desde 1977 ata 1988). E durante un ano exerceu de profesora agregada no noso centro. Feito do cal nos congratulamos e enorgullecemos. Fora no curso 1976-1977. 

(Celebración dos 120 anos de 'Instituto da Guarda'. Ana María Romero Masiá está acompañada do daquela Reitor da UDC, José María Barja Pérez. A foto é xentileza de J.C. Rivas)

 

(Ana e o profesor Emilio Insua)

Impartía aulas no diúrno e mais no nocturno e tiña coma xefe de departamento ao tamén historiador Antonio Meijide (a quen anos máis tarde lle dedicaría unha semblanza: “Antonio Meijide Pardo (1917-2004. Docencia e Investigación Histórica ao servizo de Galicia”, artigo publicado na nova andaina da revista Cornide, nº 1, 2018, p`. 123-151). Daquela era directora do noso centro María Muruais Lamas. Ana Romero participou -coma membro máis novo do claustro- na mesa de elección do novo director, Jesús Almuíña Loeda. Recorda a nosa homenaxeada anécdotas daquel tempo: por exemplo, nalgunha ocasión o profesor de relixión, Enrique Chao Espiña, cando a vía tan noviña na sala de profesores, dicíalle: Neniña, isto é para profesores, as alumnas non poden entrar aquí. E Ana María tiña que relembrarlle que ela era unha profesora.

 

(Ana María na época en que exerceu a docencia no noso Instituto. A foto é xentileza da homenaxeada)

No remate daquel curso no ‘Eusebio’, A. Romero decidiu preparar a cátedra, era o tempo, recorda para nós, en que Jose (Pose Mesura, que en paz estea) facía a mili, patrullaba en El Pinzón.

(Outra foto dos actos de celebración dos 120 anos de Instituto. Entre as autoridades académicas -Presidente da Real Academia Galega, Reitor da Universidade da Coruña... e municipais -Alcalde da Coruña- aparece o relembrado J. Pose Mesura, en representación do Estado)

 

Da súa obra, rica e rigorosa, e dos seus méritos pouco podemos engadir ao que xa está escrito. Hai, iso si, que irlle lendo aos pouquiños todo canto ten publicado. Relativo ao noso Instituto, habédesme de permitir que chame a vosa atención sobre os seus traballos sobre mulleres que pasaron polo noso centro: son nomes importantes para a historia da Coruña e para a historia de Galicia. A. Romero estudou a vida e obra de María Barbeito Cerviño (alumna que fora deste Instituto), de Mercedes Tella (tamén alumna deste Instituto); investigou e publicou sobre as primeiras alumnas do Instituto da Coruña e, en colaboración coa tamén profesora do centro, Aurora Chavert Díaz, sobre as primeiras profesoras do mesmo.

(O que fora Xefe de Departamento no centro da profesora Romero Masiá, A. Meijide. A foto, coma as de abaixo, é da colección Bartolomé-Chavert)

 

 

 

 

Da Coruña ten escrito sobre as cigarreiras, sobre a súa evolución urbanística, sobre o asociacionismo feminino progresista, sobre o republicanismo coruñés etc. Sobre Galicia son importantes, ao noso ver, o seu libro sobre o traballo das mulleres conserveiras e salgadeiras e, desde logo, a súa contribución sobre a presenza de Galicia nos textos clásicos, sen esquecer algo transcendental: Ana M. Romero Masiá foi a primeira muller en dirixir unha escavación arqueolóxica, a do Castro de Borneiro, durante bastantes anos, por certo.

 

(Curso 41-42. Nesta foto aparecen profesoras do Instituto estudadas por A. Romero nalgunha das súas numerosas publicacións)

 

Santiaguesa de nacemento, coruñesa de corazón, a Ana María Romero Masiá só nos resta desexarlle longos anos de frutífera vida. 

 

(Promoción do 31-37. Profesorado e alumnado. Tanto as primeiras alumnas como as primeiras profesoras foron temas da investigación desta gran dama do ensino. Foto da colección Bartolomé-Chavert)