8 DE MARZO
Danme, familia e
amizades, os parabéns. Podedes darmos tamén vós. Nacín un 8 de marzo. Nacín o
mesmo día cá miña avoa coruñesa. Xa que empezamos o día con datos tan
subxectivos, a título de agasallo deixádeme seguir un pouquiño relembrando
algún que outro dato privado, do ámbito familiar, máis. Por exemplo, da familia
desa avoa coruñesa en cuxa casa eu nacín, na rúa Joaquín Galiacho, en Monelos
(algún día lle dedicarei unha páxina a aqueles tempos da miña infancia e a
aquel espazo tan cambiado xa; hoxe o enfoque é outro). Dicía onte xoves a miña
amiga e ex profesora de moitos de vós, Mercedes, que cando ela era pequena
había moitas cousas malas que se silenciaban e das que se falaba en voz baixa,
como de escuros segredos: había homes, máis de un, que chegaban borrachos á
casa e zoscaban na muller: iso era algo sabido e diso, repito, falábase en voz
baixa. Eran fenómenos da esfera doméstica,
coma quen fala de fenómenos inevitables da natureza (un tornado, un
tsunami...). Todo, claro está e xa o supoñiades, a propósito da igualdade -que neste
oito de marzo se conmemora ou se quere ter presente- entre seres humanos de
distinto sexo (vénme á mente a serie de anuncios e programas e asertos que me
chegaron onte e noutronte: no correo electrónico unha xornadas interesantes da
Xunta de Galicia, unha programación riquísima que organiza a coruñesa e pública
Biblioteca Infantil e Xuvenil na que traballa a sempre encantadora Memé; no
guasap varios vídeos; na televisión... da tele quedo coas palabras de Sole
Giménez, fermosa e elegante Sole de marabillosa voz..., quen dixo algo así como
que a igualdade se constrúe todos os días, día a día). Creo que foi Sole
Giménez, xa non estou segura, a quen lle oín que nós aquí e agora non nos
podemos queixar moito (algo si, oístes o informe da Caixa? En igualdade de
oportunidades, igualdade de currículos laborais, aínda hai un 30% menos de
oportunidades para a muller á hora de atopar un traballo en España), e engadiu:
o mundo é outra cousa. Polo planeta
adiante as mulleres seguen tendo todo moito máis difícil.
Xa ides sabendo
como son e como penso: gústame sempre buscar o punto de vista que me permita
mirar adiante con optimismo, esperanza no progreso e nas posibilidades da
especie. E iso implica en ocasións mirar cara atrás. Vouno facer un momentiño e
conforme á premisa trazada, sen moverme do círculo da miña familia (incluíndo a
política). Vós disimulade e que non saia de nós. Cando eu nacín o meu avó
coruñés -que a terra lle sexa leve, quíxeno moitísimo sempre, porque a esfera
dos afectos non se solapa coa da ideoloxía igual que a cortesía non quita a
valentía- tiña preparado xa o equipo (balón, camisetas, pantalóns) do dépor.
Devolveuno bastante enfadado cando viu que era unha nena. Volveuno facer coa
miña irmá... Se fose hoxe a posibilidade de que xogaramos con ese equipo
aumentaría case un 90%. Isto é apenas unha anécdota. Moito máis grave é o feito
de deixarlle en herdanza non ao meu pai, senón a un seu irmán un negocio
produtivo. Por que? Porque o meu pai tiña dúas fillas e non necesitaban estudar
unha carreira maior. Mentres que os
sobriños varóns si. Mirade agora a grande diferenza entre ese antes e este
agora.
(Os bisavós coruñeses: o bisavó Gabriel, un dos fillos _Manuel ou Ramón- e a bisavoa Pura. Descansen en paz)
Veñamos ao caso das
avoas: a miña bisavoa coruñesa -de boa familia pero pobre- casou por amor co
meu bisavó coruñés -de boa familia e non pobre- e foron desherdados por casaren
a desgusto dos pais ricos (os meus tataravós). El emigrou a Arxentina e nunca
máis se soubo del. Ela morreu de tuberculose cando a miña avoa era unha
cativiña. Para casar, meus queridos, para casar no século pasado aínda, as
mulleres nunha inmensa maioría debían compracer os pais (relembrade os que
fostes alumnos meus cando falabamos de Os
vellos... de Castelao: Pimpinela debe casar co vello porque é unha boa rapaza, unha filla obediente
aos pais; son os propios pais quen dalgunha maneira venden a filla, trócana por comida, un modo indigno de instrumentalizar
un ser humano feminino). Así a bisavoa dos meus fillos pontevedresa: xa tiña o
baúl feito para reunirse en Buenos Aires co noivo de anos cando o seu pai a obrigou
a casar aquí cun viúvo con posibles e mais cun fillo (quen logo facía que se ía
e controlaba ás agachadas se trataba ben ese meniño...). Cambiou moito a cousa.
E máis que inda debe cambiar. Porque de igual modo que non nos gusta comer ás
mans cheas vendo a miseria humana, vendo as imaxes de medición de braciños
desnutridos e cariñas encoveiradas, da mesma maneira non podemos en absoluto
vangloriarnos dos logros igualitarios obtidos polas mulleres aquí sabendo como
sabemos que eses logros non tocan a todas as mulleres do mundo. Remato con
flores. En Údine, onde traballei tres anos cando tiña vinte e tantos, todos os
8 de marzo as mulleres ofrecían na praza de san Xácome ou Giacomo, un ramiño de
mimosas. Collede un tamén vós...
(Udine: Piazza San Giacomo e a Loggia en festas, ano 1981?)
(Piazza san Giacomo en Udín -friulano-. Pozo de Calisto)
(PD: un cumprimento
grande para as mulleres que na familia loitaron e suaron tanto para que nós -as
miñas irmás, de sangue e política, e unha servidora- remataramos por facer unha carreira maior).
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
PROGRAMA DA BIBLIOTECA INFANTIL E XUVENIL (en Durán Loriga):
CHARLAS-ENCONTRO
- Martes 12 de marzo (ás 19.00h.). Mes da muller: as nenas e as mulleres nas ciencias. Charla-encontro con Nieves Brisaboa, catedrática de linguaxes e sistemas informáticos da UDC. Para maiores de 10 anos.
- Mércores 13 de marzo (ás 19.00h.). Mes da muller: mulleres moi tecnolóxicas. Charla-encontro con Ana Belén Díaz Parepar, formadora de informática e robótica en Trainnova. Para maiores de 10 anos.
CONTACONTOS-OBRADOIROS
- Mércores 6 de marzo (ás 18.00h.). Obradoiro: xestión das emocións. Enmarcado dentro do ciclo "Contos para a igualdade", para nenxs de 3-6 anos. INSCRICIÓN XA ABERTA.
- Martes 26 de marzo (ás 18.00h.). Obradoiro: autoestima e respecto pola diversidade. Dentro do ciclo "Contos para a igualdade", para nenxs de 8-9 anos.
BEBENCONTROS
- Sábado 9 de marzo (ás 18.00h.). Bbencontro de 13-24 meses.
- Sábado 23 de marzo (ás 18.00h.). Bbencontro de 0-12 meses.
CONTACONTOS
"OS FAVORITOS DE..."
- Sábado 2 de marzo (ás 18.00h.): Os Favoritos de... Pablísimo. De 3-7 anos.
- Sábado 16 de marzo (ás 18.00h.): Os Favoritos de... Charo Pita. De 3-7 anos.
- Sábado 30 de marzo (ás 18.00h.): Os Favoritos de... Pakolas. De 3-7 anos.
Ningún comentario:
Publicar un comentario